PDF
Ählihytaý halk wekilleriniň ýygnagynyň sessiýasynda Hytaýyň Premýer-ministri Li Sýan hökümetiň 2026-njy ýyl üçin iş meýilnamasyny hödürledi. Täze ykdysady strategiýa görä, Hytaý geljek ýylda jemi içerki önümiň ösüşini 4,5-5 göterim derejesinde saklamagy we 12 milliondan gowrak täze iş ornuny döretmegi maksat edinýär. Ýurduň döwlet býujetiniň çykdajylary taryhda ilkinji gezek 30 trillion ýuana (4,2 trillion dollar) ýeter.
Tehnologiki ösüş we “Emeli aň+”
Hökümetiň hasabatynda tehnologiki özygtyýarlylyga aýratyn orun berilýär. Hytaý “Emeli aň+” iş meýilnamasyny giňeldip, ony ykdysadyýetiň ähli pudaklaryna ornaşdyrmagy meýilleşdirýär. Şeýle hem ýarymgeçirijiler, biotehnologiýalar we ýokary tehnologiýaly önümçilik ulgamlaryna döwlet maýa goýumlary artdyrylar. Bu çäreler Hytaýyň täze 15-nji bäş ýyllyk ösüş meýilnamasynyň düýp esasyny düzýär.
Içerki isleg we sosial syýasat
Ykdysadyýeti diňe bir eksport bilen däl, eýsem içerki sarp ediş bilen hem berkitmek üçin ilatyň girdejilerini ýokarlandyrmak göz öňünde tutulýar. Hökümet köne enjamlary we awtoulaglary täzelemegi goldaýan ýörite döwlet maksatnamalaryny maliýeleşdirer. Şäherlerdäki işsizlik derejesini 5,5 göterimden ýokarlandyrmazlyk we durmuş üpjünçilik ulgamyny döwrebaplaşdyrmak ileri tutulýan wezipeleriň biri hökmünde kesgitlendi.
Halkara hyzmatdaşlyk we “Bir guşak, bir ýol”
Hytaý “Bir guşak, bir ýol” başlangyjynyň çäginde halkara infrastruktura taslamalaryna täze itergi berer. Hususan-da, Hytaý-Ýewropa we Hytaý-Aziýa ýokary tizlikli demir ýollarynyň mümkinçilikleri giňeldiler hem-de ýurduň günbatarynda täze gury ýer-deňiz ulag geçelgesiniň gurluşygy çaltlandyrylar. Şonuň bilen birlikde, daşary ýurtly maýadarlar üçin şertleri gowulandyrmak we “akylly gümrük” ulgamyny ornaşdyrmak meýilleşdirilýär.
Ekologiýa we “ýaşyl” ykdysadyýet
Strategiýada daşky gurşawy goramak meselelerine hem üns çekilýär. Hytaý ýakyn ýyllarda ykdysadyýetiň energiýa sarp edijiligini peseltmegi we kömürturşy gazynyň zyňyndylaryny yzygiderli azaltmagy maksat edinýär. Bu bolsa ýurduň “ýaşyl” ykdysadyýet modeline geçişini çaltlandyrmaga gönükdirilendir.
