UEFA Çempionlar Ligasynda mundan öňki 7 duşuşykda ýeňiş gazanyp, soňkusynda utulan “Liwerpul” sanawy 1-nji orunda tamamlady. Myhmançylykda PSW bilen duşuşan “Liwerpul” ätiýaçdaky oýunçylary bilen çykan duşuşygynda eýndhowenlilerden 3-2 hasabynda asgyn geldi. “Barselona” öz meýdançasynda “Atalanta” bilen 2-2 hasabynda deňme-deň oýnady.

“Žironany” myhmançylykda Žoržinio hem-de Nwaneriniň gollary bilen 2-1 ýeňen “Arsenal” 3-nji, Monakony Lautara Martinesiň het-trigi bilen 3-0 hasabynda ýeňen “Inter” 4-nji orny eýeledi. “Inter” 8 oýunda 1 gol geçirtdi. Grizmannyň 2 gol geçiren oýnunda “Atletiko Madrid” myhmançylykda “Red Bull Salsburgy” 4-1 hasabynda utdy. “Baýer” öz meýdançasynda “Sparta Pragany” 2-0 hasabynda ýeňip, 6-njy orun bilen 1/8 finala çykdy. Germaniýada oýnalan beýleki 2 duşuşykda birmeňzeş netijeler hasaba alyndy. “Bundesligada” şowsuz çykyş edýän “Borussiýa Dortmund” öz meýdançasynda “Şahtýor Doneskden”, “Bawariýa” bolsa “Slowan Bratislawadan” 3-1 hasaplar bilen üstün çykdy. Dortmundlylaryň gollarynyň 2-sini Seru Girassi derwezä girizdi.

Tapgyryň iň köp gol geçirilen duşuşygynda “Lill” öz meýdançasynda geçen tapgyrda “Bawariýanyň” derwezesinden jogapsyz 3 gol girizen “Feýenoordy” 6-1 hasabynda ýeňdi. “Lill” topary soňky 74-80-nji minutlar aralygynda 3 gol geçirdi. 6 goluň 2-si awtogol bolup, “Feýenoordyň” awstriýaly goragçysy Gernot Trauner 38-nji hem-de 76-njy minutlarda topy ýalňyşlyk bilen öz derwezesinden girizdi. “Lill” bu ýeňişden soň 7-nji orna beýgelip, sanawy garaşylmadyk ýerde tamamlady. 42 ýyldan soň UEFA-nyň iň uly klub ýaryşyna gatnaşan “Aston Willa” Morgan Rojersiň het-trik eden duşuşygynda “Seltigi” 4-2 hasabynda ýeňip, 8-nji ýeri eýelemegi başardy.

ЭТО МОЖЕТ БЫТЬ ИНТЕРЕСНОЕЩЕ ОТ АВТОРА