Birleşen Arap Emirliklerinde Al-Maha Raşid Al-Meýri atly üç ýaşly gyzjagaz «Gül» we «Balary» atly çagalara niýetlenen iki powestini neşir etdirip, taryhda iň ýaş ýazyjy boldy. Onuň bir günde her iki kitabynyň müňden gowrak nusgasy satylyp, Ginnesiň rekordlar kitabynda ykrar edilen dünýäniň iň ýaş ýazyjysy boldy.
Al-Mahanyň hekaýalara we surat çekmäge bolan gyzyklanmasy, çagalar üçin niýetlenen fantaziýa žanryndaky hekaýalary ýazmagyna sebäp bolýar. Al-Maha öz hekaýalary arkaly okyjylara daşky gurşaw meseleleriniň ähmiýetini ýetirmäge synanyşýar.
– Geçen ýylyň noýabr aýynda Dubaýda geçirilen COP28 konferensiýasyna gatnaşanymyzda, Al-Mahanyň daşky gurşaw temasy bilen baglanyşykly hekaýalary döretmek pikirleriniň bardygyny bilip galdym. Maslahata gatnaşanymyzdan soň, daşky gurşawy goramagyň möhümdigine we çagalara bu mesele barada bilim bermegiň zerurdygyna düşündik. Al-Maha okamak endikleriniň ýaşlykdan ösdürilip bilinjekdigini subut edip, özüniň başarnygy we höwesi bilen bizi haýran galdyrýar – diýip, Al-Mahanyň ejesi gürrüň berdi.
Häzirki wagtda Al-Mahanyň uly gyz dogany iki dilde kitap neşir etmek boýunça gyzlaryň arasynda iň ýaş ýazyjy, agasy bolsa erkekleriň arasynda iň ýaş ýazyjydyr. Çagalaryň ejesiniň belleýşi ýaly, onuň doganlary Al-Mahanyň hem ýazmaga bolan höwesini oýarypdyrlar. Ejeleri çagalaryň zehinini ýüze çykarmagyň, olary terbiýelemegiň we jemgyýetiň öz üstüne jogapkärçiligi alyp biljek işjeň agzalary bolup bilmekleri üçin özlerine bolan ynamyny artdyrmagyň möhümdigini nygtaýar.
