Formula 1 boýunça möwsümiň 11-nji ýaryşy Germaniýada geçirilip, “Aýfelýa Gran Prisinde” “Mercedes” toparynyň britan sürüjisi Lýuwis Hamilton ýeňiji boldy. Ol ýurduň Nürburgring şäheriniň adybir trassasynda geçirilen ýaryşda 60 aýlawy 1 sagat 35 minut 49,641 sekuntda tamamlap, möwsümdäki 6-njy ýeňşini gazandy. 2-nji hatardan bat alan Hamilton karýerasyndaky 91-nji ýeňşini gazanyp, rowaýaty sürüji Mihael Şumaheriň taryhy rekordyna şärik boldy. Bäsleşikden soň, Şumaheriň ogly Mik Şumaher Hamiltona kakasynyň kaskalarynyň birini ýadygärlik sowgat etdi.
Ýaryşda Hamiltondan 4,7 sekunt yza galan “Red Bulluň” niderland sürüjisi Maks Werstappen 2-nji ýeri eýeledi. Münberiň 3-nji basgançagyna-da ýeňijiden 14,613 sekunt soň pellehana gelen awstraliýaly Daniel Rikkiardo (“Renault”) çykdy. Ilkinji hatardan başlan Waltteri Bottas ulagynda ýüze çykan näsazlyk sebäpli ýaryşy tamamlap bilmedi.
Şeýle-de 323-nji gezek Formula 1 ýaryşyna gatnaşan Alfa Romeo toparynyň fin sürüjisi Kimi Raikkonen bu ugurda rekordy öz adyna geçirdi. Ozalky rekord braziliýaly Rubens Barikello degişlidi.
12-nji ýaryşdan soň, utuk sanyny 230-a ýetiren Lýuwis Hamilton barha arany açyp, çempionlyga kem-kemden golaýlaýar. 161 utukly Bottas 2-nji, 147 utuk toplan Werstappen 3-nji orny eýeleýär. Möwsümiň 12-nji ýaryşy 25-nji oktýabrda Portugaliýada geçiriler.
