Marokkoda geçirilýän 19-njy FIFA Klublararasy Dünýä Kubogynda finala çykan toparlar belli boldy. Yklymlaryň Çempionlar Ligasynyň çempionlarynyň ýaryşynda Ispaniýanyň “Real Madrid” toparyna Müsüriň “Al Ahli” toparyndan üstün çykmak kyn düşmedi. 4-1 hasabynda ýeňiş gazanan “Real Madridiň” gollaryny 42-nji minutda Winisius Junior, 46-njy minutda Federiko Walwerde, 90+2-nji minutda Rodrigo, 90+8-nji minutda-da Arribas derwezä girizdi. Soňky 2 goluň pasyny Seballosyň berendigini hem belläliň. “Al Ahliniň” ýeke-täk goluny bolsa 65-nji minutda penaltiden Ali Maalul öz adyna ýazdyrdy.
Beýleki ýarym finalda ýarym finalda Braziliýanyň “Flamengo” topary bilen Saud Arabystanynyň “Al-Hilal” topary duşuşdy. Çekeleşikli geçen oýunda arap kluby 3-2 hasabynda ýeňiş gazandy. Oýnuň 4-nji minutynda penaltini dürs uran S. Al-Dawsari araplary öňe çykardy. 20-nji minutda Pedro hasaby deňlese-de, 45+9-njy minutda ýene penaltiden tapawutlanan S. Al-Dawsari hasaby 2-1-e ýetirdi. 70-nji minutda Wiettonyň golundan soň aratapawut 2-ä çykdy. 90+1-nji minutda Pedronyň goly brazil klubuna ýeňiş üçin ýeterlik bolmady.
Şunlukda, 11-nji fewralda oýnaljak finalda “Real Madrid” bilen “Al-Hilal” duşuşar. Aşgabat wagty bilen 00:00-da başlanjak oýun paýtagt Rabatdaky Şazada Mulaý Abdellahyň adyny göterýän 60 müň orunlyk stadionda oýnalar.
“Real Madrid” bu ýaryşda 5-nji gezek finala çykan bolsa, “Al-Hilal” ilkinji sapar kuboga ymtylýar. Al-Hilal Ýaponiýanyň “Kaşima Antlers” hem-de BAE-niň “Al-Ain” toparlaryndan finala çykan 3-nji Aziýa wekili boldy. “Real Madrid” mundan öňki 4 finalynyň 2-sinde şol Aziýa klublaryndan üstün çykypdy.
1-nji fewralda Marokkoda badalga alan ýaryşyň 1-nji tapgyrynda “Al Ahli” Täze Zelandiýanyň “Oklend Siti” toparyny 3-0 hasabynda ýeňipdi. 2-nji tapgyrda “Al Ahli” ABŞ-nyň “Seattl Saunders” klubundan 1-0 üstün çykypdy. “Al-Hilal” 2-nji tapgyrda Marokkonyň “Widad Kazablanka” toparyny penaltileriň netijesinde ýeňmegi başarypdy (1-1, 5-3 p).
