Marokkoda geçirilen 19-njy FIFA Klublararasy Dünýä Kubogy garaşylyşy ýaly “Real Madridiň” çempionlygy bilen tamamlandy. Paýtagt Rabatdaky Şazada Mulaý Abdellahyň adyny göterýän stadionda oýnalan finalda angliýaly Antoni Teýlor jürlewük çalyp, duşuşyga 44 439 janköýer tomaşa etdi. “Real Madrid” bilen “Al-Hilalyň” arasyndaky çekeleşikli geçen duşuşykda janköýerler 8 goluň şaýady boldular. Şol gollaryň has köprägini geçiren “Real Madrid” 5-3 hasabynda ýeňşini baýram etdi. Duşuşygyň 13-nji minutynda Winisius Junior hasaby açsa, 5 minutdan soň Federiko Walwerde aratapawudy 2-ä çykardy. 26-njy minutda arap kluby geçirden 2 golunyň biriniň öwezini dolmagy başardy. Malili hüjümçi Mussa Marega hasaby 2-1-e ýetirdi. Toparlar bu hasap bilen arakesmä çykdy. 2-nji ýarymda “Real Madrid” ýene-de yzly-yzyna 2 gol geçirdi. 54-nji minutda Winisius Junioryň pasyndan soň Karim Benzema, 58-nji minutda-da Walwerde duşuşykda 2-nji goluny derwezä girizdi. 63-nji minutda “Al-Hilalyň” argentinaly ýyldyzy Lusiano Wietto araplary az-owlak umytlandyrsa-da, 69-njy minutda-da oýnuň gahrymany Winisius Junior arap toparynyň derwezesinden 5-nji goly geçirdi. Bu goldan 10 minut soň Wietto ýene bir gezek tapawutlandy. Bu goldan soň hasaby deňlemek üçin az owlak umytlanan arap klubuna bu arzuwy başartmady. Netijede, 5-3 hasabynda ýeňiş gazanan “Real Madrid” 2014-nji, 2016-njy, 2017-nji we 2018-nji ýyllardan soň FIFA-nyň bu kubogyny gazanyp, öz rekordyny ösdürdi. Bu kubok “Real Madridiň” taryhyndaky 99-njy kubok hökmünde hasaba alyndy. 68 kubogy Ispaniýanyň çäginde gazanan madridliler 31 kubogy-da halkara ýaryşlarda asmana göterdi. “Real Madrid” esasy bäsdeşi “Barselonadan” 1 kubok öňe saýlandy. Tälimçi Karlo Ançelotti bolsa klubdaky 9-njy, tälimçiligindäki 25-nji kubogyny gazandy. Ýewropanyň klublary yzly-yzyna 10-njy, umumylykda-da 15-nji gezek FIFA-nyň bu kubogyny eýelemegi başardy.
Ýaryşda 3-nji ýeri brazil kluby “Flamengo eýeläp, olar bu ugurda Müsüriň “Al Ahli” toparyny Gabriel Barbosa (11 p, 85 p) hem-de Pedronyň (77, 90+1) gollary bilen 4-2 hasabynda ýeňlişe sezewar etdi. “Al Ahli” toparynyň gollarynyň ikisini-de Abdel Kader (38, 60) öz adyna
ýazdyrdy.
Bäsleşigiň “Altyn top” baýragyna Winisius Junior, “Kümüş top” baýragyna Federiko Walwerde, “Bürünç top” baýragyna-da Lusiano Wietto mynasyp boldy. 4 gol geçiren braziliýaly Pedro ýaryşyň iň netijeli futbolçy hökmünde ykrar edildi.
