Berkarar döwletiň täze eýýamynyň Galkynyşy döwründe halkymyzyň maddy we ruhy gymmatlyklary ösüşler üçin egsilmez çeşme bolup hyzmat edýär. Hut şonuň üçin hem halkymyzyň asyrlar aşyp kämilleşen medeniýeti, dili, edebiýaty, sungaty, taryhy we gadymy milli mirasy ylmy taýdan içgin öwrenilýär. Gahryman Arkadagymyz: «Magtymguly Pyragy adamzada tämiz ruhly, şirin zybanly ajaýyp şygyrlary miras galdyran akyldar şahyrdyr. Bu günki gün adamzat türkmen halkynyň beýik ogly Magtymguly Pyragynyň hatyrasyny belentde tutup, beýik söz ussadynyň şygyrlaryndan egsilmez ylham, ruhy güýç alýar» diýip bellemek bilen, dana şahyrymyzyň döredijiliginiň uç-gyraksyz ummandygyny we onuň çuňňur öwrenilýändigini nygtaýar.
Beýik akyldarymyzyň «Berkarar döwlet istärin» diýen göwün islegi bu günki gün wysalyna gowuşdy. Bize Berkarar döwletiň täze eýýamynyň Galkynyşy döwrüniň eşret-hözirini görmek bagty miýesser etdi. Türkmen halkynyň Milli Lideri Gahryman Arkadagymyz «Ynsan kalbynyň öçmejek nury» atly kitabynda: «Beýik akyldar öz döredijiliginde türkmen jemgyýetiniň synmaz sütünlerine öwrülen möhüm syýasy-filosofik, jemgyýetçilik-ynsanperwerlik we ruhy-ahlak garaýyşlaryny öňe sürdi. Nusgawy şahyryň bize goýup giden mirasy özboluşly terbiýe mekdebidir» diýip belleýär. Hakykatdanam, Magtymguly Pyragynyň çeper döredijiligi uly terbiýeçilik mekdebidir. Dana şahyryň öwüt-ündewe ýugrulan şygyrlarynda şahsyýet, maşgala, dünýä bilen bagly kämil pikirler öňe sürülýär.
Ýylymyzyň ganatly şygary diňe bir medeniýet, sungat, döredijilik işgärlerini däl, ildeşlerimiziň her birini hormatly Prezidentimiziň «Watan diňe halky bilen Watandyr! Döwlet diňe halky bilen döwletdir!» diýen tutumly ýörelgesinden gelip çykýan aýdyň maksatlary asylly işler, ajaýyp eserler arkaly çeper wasp etmeklige hyjuwlandyrýar.
Dana şahyr agzybir, özbaşdak döwletiň ýokdugy üçin halkyň şeýle horluklara, jebir-süteme sezewar bolýandygyna akyl ýetiripdir. Şonuň üçin hem şahyr «Türkmeniň», «Döker bolduk ýaşymyz», «Öňi-ardy bilinmez», «Türkmen binasy», «Gidiji bolma», «Il ýagşy», «Ýykmaýan ärden» ýaly goşgularynda türkmen halkyny birleşmäge – bir saçagyň başyna jem bolmaga çagyrypdyr:
Gurdugym aslynda bilgil, bu zeminiň myhydyr,
Erer ol erkin mydam, budur türkmen binasy.
Söz äleminiň ussady, akyldar şahyrymyz Magtymguly Pyragy türkmen edebiýatynyň taryhynda halkymyzyň garaşsyzlygyny, özbaşdaklygyny, çäk bitewüligini arzuwlan şahyr hökmünde tanalýar. Ol döwrüň syýasy gazanynda gaýnap, ähli türkmenleri birleşdirip, özbaşdak türkmen döwletiniň döredilmegini arzuw eden watansöýüji şahyrdyr. Bu pikir şahyryň beýleki şygyrlary bilen birlikde, «Döker bolduk ýaşymyz» goşgusynyň içinden hem eriş-argaç bolup geçipdir.
Magtymguly Pyragy ata Watanyny jany-teni bilen söýüpdir. Halky watansöýüjilige çagyryp, ençeme goşgulary döredipdir. Agzybirlikde gerek bolan esasy zatlary bir döwletlilik, bir başa bakmak hasaplan beýik Pyragy birleşmek meýillerini özüniň edebiýat meýdanynda uly yz galdyran «Döker bolduk ýaşymyz», «Il biläni», «Türkmeniň» ýaly şygyrlarynda çeper beýan edipdir. Magtymguly Pyragy halkymyz bir başa, bir döwlete gulluk etse, onda onuň öňünde hiç bir güýjüň durup bilmejegine çuňňur göz ýetirip:
Türkmenler baglasa bir ýere bili,
Gurudar Gulzumy, derýaýy-Nili,
Teke, ýomut, gökleň, ýazyr, alili,
Bir döwlete gulluk etsek bäşimiz
diýip, çeper beýan edipdir.
Akyldaryň «Bir suprada taýýar kylynsa aşlar, göteriler ol ykbaly türkmeniň» diýip belleýşi ýaly, ýurdumyz Arkadagly Gahryman Serdarymyzyň taýsyz tagallalary bilen ösüşiň täze belentliklerine tarap barýar. Akyldar şahyrymyzyň döredijiligine uly sarpa goýlup, ony dünýä ýaýmakda ýurdumyzyň bagtyýar raýatlarynyň göwün guşuny ganatlandyryp, buýsandyrýan asylly, döwletli işleri amala aşyrýan Gahryman Arkadagymyzyň, Arkadagly Serdarymyzyň jany sag, ömri uzak bolsun.
Tagandurdy TAGANDURDYÝEW,
Döwletmämmet Azady adyndaky Türkmen milli dünýä dilleri institutynyň uly mugallymy, pedagogika ylymlarynyň kandidaty.
